العضوة: 378864 , 7 years ago

قمر:تكرم معلم بقيت عم اشتغل سنتين عند عماد ،كبر شغلو كتير خلال السنتين و وثق فيني اكتر و زادلي مرتبي و صار يدخلني على مكتبو لساعدو بالحسابات و حتى علمني اشتغل على الكمبيوتر و كيف اعمل جداول و تواريخ بدفعة السيارات يلي كنا نستوردا و علمني السواقة ،و احيانا كان يخليني اوقف معو هو و عم يقنع الزبون بسيارة او يتفاوض معو على سعرا ،تعلمت عندو شغلات كتير و كنت مرتاحة حتى اجا هداك اليوم ،يلي كنت فيه بالبريود و تعبانة كتير و ما كان عندي قبل ب ليلة ولا حبة مسكن ،لهيك تأخرت بالنومة و انا كنت بالعادة بفيق بجهز حالي قبل ما يفتح عماد المحل ، لهيك استسلمت للنوم و ما فقت الا على صورة وجه عماد عن قرب عم يطلع فيني ،اول ما شفتو نفض جسمي و ارتعبت و لزقت بالحيط انا و عم غطي حالي بالحرام ،مسك الحرام و سحبو ،كتفت ايدي انا وعم حاول خبي حالي عماد:البسي و الحقيني على المكتب عرفت انو هاليوم رح يكون اخر يوم شغل الي عندو بعد ما عرف هويتي ،لبست و فتت عملتلو قهوة و لحقتو على المكتب ،ضيفتو انا و عم اتجاهل نظراتو الي ،حملت الصنية و بدي اطلع و ارجع على المطبخ عماد:تعي و قعدي هون لشوف قمر:معلم انا …. عماد:ايه ؟

العضوة: 378864 , 7 years ago

عماد:ايه ؟ قمر:ما بعرف شو بدي قول بس انا عندي اسبابي ،انا قصرت معك شي بالشغل ؟ عماد:شو اسمك ؟ قمر:اسمي قمر عماد:سنتين عم تشتغلي عندي و انا مفكرك صبي و عم ناديلك محمد و بالاخير بتطلعي بنت قمر:مضطرة ولله مضطرة عماد:تعي اقعدي هون و احكيلي لشوف اصلك و فصلك و وين اهلك قعدت على الكرسي و حكتلو كل شي لعماد هو و عم يشرب قهوةو يهز براسو بدون ما يقاطعني بكلمة و بالاخير ختمت كلامي قمر:انا ما عندي محل روح عليه و انا مرتاحة عندك و حابة ضل هيك عماد:بدك تبقي طول عمرك هيك ،حاالقة شعرك متل الصبيان و انت بنت ،ما بتقدري لانو الشاب بس يكبر بصير عندو دقن. و شوارب و بيخشن صوتو ،و انت ما رح يصير معك هيك و الكل رح يعرف هويتك حتى لو خبيتي هالشي قمر:انت عرفت و ما رح تحكي لحدا اكيد عماد:لا ما رح احكي بس حرام ،حرام تبقي هيك قمر:انا مرتاحة عماد:بس قدامك فرص كتير لكونك بنت تتزوجي و يصير عندك عيلة و فيكي كمان تشتغلي شغل يناسبك قمر:كيف بدي اقدر اعمل كل هالشي و انا ما معي هوية و ما بعرف كنيتي ،حتى نفوس ما الي بالدولة ،يعني ما موجودة كمواطنة ،انا على الهامش ،لهيك خليني عيش باسهل طريقة الي توفر لقمة عيشي عماد:ما بعرف شو بدي قلك ،طيب رح اتركك على راحتك اذا انت هيك مرتاحة كملت شغلي عند عماد متل اول بس في شغلات كتيرة تغيرت من اتجاهو لعماد بعد ما عرف اني بنت ،صار اي عمل فيه مجهود ما يكلفني فيه و صار يعملو لحالو حتى صار حذر كتير بالتعامل علي اذا صادفت و نسي و حط ايدو على راسي او رقبتي كعادتو ،يتذكر فورا و يسحب ايدو و يعتذر ،بس بعد فترة فاجئني بفكرتو قمر:ليش ؟يعني انا قصرت بشغلي عندك

العضوة: 378864 , 7 years ago

قمر:ليش ؟يعني انا قصرت بشغلي عندك عماد:لا بس هيك شغل ما مناسب لبنت متلك ،انا بدبرلك شغل يليق فيكي ك بنت احسن ما تبقي هيك متخباية ورا هالتياب الصبيانية و قصة هالشعر قمر:بس انا مرتاحة بالشغل عندك و ما اشتكيت من وضعي ،يعني ملاقية محل نام فيه و عم اكل و عم اخد راتب منيح عماد:بس الحياة ما هيك ،لازم تطلعي تشوفي الدنيا و تعيشي حياتك ك بنت ،ما تفكريني اني ما بقا حابب وجودك هون و معي بالشغل بس انا حابب قدملك مساعدة لوجه الله و لانك بتستاهلي ،على كل حال لسا بكير شوي على هالخطوة لانو في كام شغلة لازم اعملك اياها قبل ما تطلعي من عندي بس حبيت اعطيكي خبر كرمال تجهزي نفسيتك للموضوع تابعت شغلي عند عماد بعد ما نسيت شو قلي عن موضوع الشغل الجديد و اني اطلع و واجه العالم كانثى ،لليوم يلي ناداني فيه و كنت عم اشطف برا المحل ،فتت عندو على المكتب ،كان قاعد على الكرسي و ورا طاولتو و قاعدو عندو رجال بعمر ال 45 سنة ،اطلع فيني الرجال نظرة من تحت لفوق و رجع اطلع بعماد عماد:هاي هي …قمر تعي اقعدي هون

العضوة: 378864 , 7 years ago

عماد:هاي هي …قمر تعي اقعدي هون قربت قعدت على الكرسي انا و عم اطلع بعماد و انا مزعوجة لانو ما كنت بحب حدا يعرف اسمي او اني بنت احمد:عمو انت متأكدة انو ما عندك نفوس بالدولة او مثلا ما متذكرة كنيتك قمر:لا ما عندي ،متأكدة رجع سند ضهرو هو و عم يتنهد و رفع شفايفو احمد:هيك الموضوع شوي صعب عماد:بس اكيد الها حلة احمد:الها حلة بس مكلفة شوي و بتاخد وقت و اجراءات طويلة بدنا نلاقيلا كنية و شهادة ولادة و الخ عماد:انت شفلي الموضوع و اديش بكلف و حكيني رجع اطلع فيني احمد و هز براسو احمد:انشالله خير ،يلا عن اذنك هلأ قام وقف احمد و سلم على عماد و طلع من المحل قمر:شو كان بدك مني؟ عماد:بدي اعملك هوية قمر:بس انا ما بدي هوية عماد:شو فارقة معك اذا صار عندك هوية او لا قمر:ما فارقة شي عماد:اي خلص معناها ،روحي كملي شغلك و اتركي الموضوع علي قبل ما اطلع من المكتب عماد:قمر قمر:ايه عماد:ما تقصي شعرك هالفترة هزيت براسي و بقيت طالعة بوجهي ،ما بعرف ليش ما كنت حابة يصير عندي هوية او يمكن كنت خايفة ،بعد شهرين زارنا احمد و اخدني معو و صورني و بعدا فتنا على مباني كبيرة كانت اول مرة بفوت عليا ،كنت فوت ابصم و وقع بس ما اعرف على شو بالضبط ،حتى بعد 6 شهور زارنا مرة تانية و اعطاني بايدي بطاقة صغيرة ،قلبتا انا و عم اقرأ فيا معلومات عني تمنيت لو كانت حقيقية ،اسم الاب و الام و مكان الولادة و اسمي الجديد (مروى القدسي) احمد:مبروك و هاي صار عندك هوية مسكتا و قلبتا بين ايدي عماد:مبروك

العضوة: 378864 , 7 years ago

عماد:مبروك قمر:الله يبارك فيكن ،حسيت بسعادة لا توصف ،انا هلأ صرت انسانة ،الي اسم و كنية و نفوس و تاريخ ولادة و الي كيان و وجود ،انا هلأ خلقت على الدنيا ،بعد.يومين اعطاني عماد اذن لانزل على السوق و اشتري تياب جديدة ،و نزلت على السوق لاشتري بالمصاري يلي كنت عم حوشن كل شي كان بنفسي اشتريه طول عمري ،اشتريت بجامات بناتية و فساتين و احذية نسائية ناعمة و حبكات لشعري و بارفانات و شغلات كتير كنت مر من جنب الواجهات انا و عم اطلع و احلم فيا ،كنت حابة احتفل بانوثتي و اخيرا ،رجعت على المعرض انا و حاملة كتير اكياس ،كان عماد واقف على الباب ،ا طلع فيني و ضحك عماد:طولتي كتير ،شو شارية السوق كلو؟ قمر:ههههه هيك شي عماد:بس ما عندك محل الن قمر:يييييه نسيت ،وين بدي روح فين عماد:فوتي فرجيني شو اشتريتي بما اني ماالل و ما في شغل فتنا على المكتب و زتيت الاكياس على الارض و فتحت كيس كيس انا و عم فرجيه لعماد انا و مبسوطة و هو حاطط ايدو على خدو و عم يتفرج و يضحك ،يمكن كان عم يتخيل شكلي بهاللبس قمر:حلوين ؟ عماد:ايه حلوين و هدلاك الكيسين ما فتحتين ،شو فين؟ تلبكت و رحت حملتن و حطيتن بقلب بعض ،كان فين تياب داخلية نسائية و خجلت فرجيه اياهن قمر:ما فين شي ،شوية اكسسوارات عماد:مبروكين ،تهرين بالهنا قمر:الله يبارك فيك عماد:تأخر الوقت ؛يلا انا بدي سكر قمر:ايه يلا بس ل لم الاكياس لميتن عن الارض و فتت على غرفتي ،و طلع عماد و سكر المحل و انا رجعت فتحتن و تفرجت علين و شميت ريحتن ،كانت اول مرة بحياتي بشم ريحة التياب الجديدة و من وقتا عشقت هالريحة و نمت انا و حاطتن بحضني على كترة فرحتي فين،تاني يوم فقت متحمسة لالبس تيابي الجداد ،لبست فستان طويل معرق ،و وقفت اطلع على حالي بالمرية،ارتعبت اول ما شفت انعكاس شكلي ؛ حسيت حالي

العضوة: 378864 , 7 years ago

شكلي ؛ حسيت حالي غريبة ما بشبه حالي ابدا و ما كان عندي الشجاعة لاطلع فيه ؛ما كان عندي القوة لاتخلص من الذكر يلي ربي جواتي ،رجعت شلحتو بسرعة كانو شي مرض معدي و زتيتو على الصوفاية و لبست المشد على صدري وفوقو تيابي االقديمة و ربطت شعري كعكة و لبست كاسكيت ،اول ما شافني عماد ،اطلع فيني و على هيئتي يلي توقعا تكون متغيرة،ما علق ابدا و خاصة انو انا بقيت مزعوجة طول اليوم من خوفي من التغيير،كومت التياب كلن فوق بعضن و سكرت الخزانة علين حتى ما بقا ارجع شوفن و انزعج اكتر و حس بضعفي و فشلي بانو عيش الانثى يلي ماتت فيني ،و من وقتا ما بقا رجعت اشتريت شي مع انو كنت مخططة لاشتري شغلات كتير و رجعت حوش من جديد حتى عماد احرجني بيوم عماد:انت مو على اساس اشتريتي تياب كتير ،وينن ما عم شوفك عم تلبسين قمر:ما ..ما…كتير حبيتن عماد:انا شفتن حلوين قمر:يمكن عماد:بكرا االبسي منن لانو عنا مشوار و ضبي كل اغراضك كمان لانو رح تطلعي من هونمن غير رجعة …..يتبع   الجزء الرابع:

العضوة: 378864 , 7 years ago

مافي متابعة كمان متل مبارح😅

العضوة: 393450 , 7 years ago

كملي

العضوة: 378864 , 7 years ago

الجزء الرابع: قمر:ليش ؟وين بدي روح؟ عماد:بكرا بتعرفي تاني يوم لبست بنطلون جينز و جاكيت اسود جلد وربطت شعري ذيل الحصان و لبست خفافة برجلي و نطرتو لعماد برا بس اول ما شافني ،عبس و زم شفايفو عماد:ماشي الحال بس ما كتير يعني فرقتي طلعنا بالسيارة و بعد نص ساعة صف قدام مطعم ،نزل و فات على المطعم و انا مشيت وراه بين الطاولات و انا عم اطلع على فخامة المكان من الطاولات للكراسي للسقف للارضيات و حتى الناس يلي كانو قاعدين فيه كانو ناس رفع كتير ، طلعنا على الطابق التاني ،دق باب غرفة دقتين و فات ،انا بقيت واقفة برا التفت علي عماد:شبك ،تعي فوتي فات و سلم على صاحب المطعم ابو سليم عماد:هاي البنت يلي خبرتك عليا ،شو بدك تلاقيلا شغلة عندك ابو سليم: ولله يا عماد على اساس حطا نادلة بس ما عندي شاغر الا بالمطبخ ،لازمنا مساعدة شيف ،بس بوعدك اذا صار عندي شاغر بالسيرفيس رح بنقلا فورا عماد:ما بتقصر ،ايمت فينا تبلش شغل ؟ ابو سليم :من هاللحظة ،شو عمرك ؟ قمر: 16سنة ابوسليم:عمرا صغير ،المطبخ مناسب الها حاليا عماد:يلي بتشوفو مناسب ،بس دير بالك عليها ،يتيمة و ما الها حدا ابو سليم:ما توصي يا عماد اجت صبية اسما نهال و طلبت مني الحقا،طلعت انا و عيوني معلقة بعماد،حسيت حالي متل الطفلة الصغيرة و عم يسحبو ا من حضن ابوا ،كنت مدايقة كتير و مرغمة على الشغل ، اخدتني على غرفة فيا تختين طابقين و خزانة و طلبت مني ضب تيابي بالخزانة ،بعد ما خلصت التقيت بعماد قبل ما يروح ،فات لعندي ليشوف الوضع عماد:قمر اي شي بيلزمك او ما عجبك و ما ارتحتي ما تتردي انك تمري عندي عالمعرض و تخبريني ،بلاقيلك شغل تاني ،و بالنسبة للمنامة رح تنامي هون مع صبية تانية

العضوة: 378129 , 7 years ago

@user-378864 فيه فيه متابعه يلا كملي القضة

العضوة: 378864 , 7 years ago

طيب 😃رح كمل

العضوة: 378864 , 7 years ago

شغل تاني ،و بالنسبة للمنامة رح تنامي هون مع صبية تانية قمر:ماشي ،شكرا الك تركني عماد و راح و انا لبست تياب الشغل و فتت على المطبخ اتعرف على الناس يلي بدي شوفن كل يوم و اشتغل معن ،اول ما فتت الكل اطلع علي متل الدخيل و انا ما حسيت بالارتياح ابدا ،حتى قربت مني بنت قصيرة و صحتا متوسطة ،بشرتا حنطية و عيون عسلية منال : انت الشغيلة الجديدة ؟ قمر:ايه منال:شو اسمك؟ قمر:اسمي قمر محمد:اهلا و سهلا انا االشيف محمد اطلعت عليه نظرة سريعة ،شاب متوسط الطول اسمر و عيون خضر قمر:انا شو بدي اشتغل هون؟ محمد:شكلك مستعجلة كتير و فايتة متحمسة صار يضحك و الكل ضحك معاه و انا احمر وجهي محمد:انت رح تشتغلي تحت ايدي ،يعني شو بقلك بتعملي بس لازم تكوني سريعة ،انت ما اشتغلتي من قبل بهيك مجال؟ قمر:لا ،هاي اول مرة ؟ محمد:يلا بكرا بتتعلمي بعدين صفق بايديه ليفك التجمع يلي صار حولي محمد:يلا خلصت جلسة التعارف كل واحد على شغلو و انت تعي معي كنت انا و صبيتين اكبر مني بخمس سنين منال خطيبتو لمحمد و دانية نشتغل بالمطبخ تحت ايد محمد اما نهال وثريا و موسى يشتغلو نوادل بالقسم الخارجي،اول اسبوع الي بالشغل كنت متلبكة كتير و بطيئة مقارنة مع الباقي بس محمد كان بالو طويل علي و انا كنت عم اتعلم و افرق يوم عن يوم ،كان يطلب مني شغلات خفيفة متل تفريم خضرة او نقع دجاج 

العضوة: 378864 , 7 years ago

تفريم خضرة او نقع دجاج و بعدين بلشت اتعلم القلي و الشوي ،كان الشغل متعب و طول اليوم مضغوطين و ما عنا استراحة الا فترة الغدا حتى يجي اخر الليل كون تعبانة كتير و بدي نام ،باول اسبوع شغل ما اختلطت بحدا حتى نهال يلي كانت تنام معي بنفس الغرفة ،كانت علاقتي معا رسمية كتير حتى اجت يوم عطلتنا ،المسا فتحت نهال شنتة صغيرة بلشت ضب تيابا ،كنت متفاجئة و مترددة لاسالها شو عم تعمل قمر:لوين رايحة ؟ نهال:مسافرة لعند اهلي ،و انت ما بتروحي لعند اهلك؟ قمر:امبلا طبعا بسافر لعند اهلي كمان نهال:وين ساكنين اهلك ؟ قمر:….بالجنوب نهال:وين بالجنوب ؟ قمر:انت كام اخت و اخ عندك؟ نهال:انا عندي اختين و اخ بس اصغر مني قمر:ايه و ابوكي و امك… نهال:ابي ميت و امي عايشة ،و لو ابي عايش ما كنت شفتيني عم اشتغل هون بس مضطرة قمر:ايه و انا هيك كمان ابي ميت و امي مريضة و عندي 5 اخوات و انا اكبر وحدة فين و انا بشتغل كرمالن نهال:بس شي نهار بدنا نقعد مع بعض و نتعرف على بعض اكتر قمر:ايه ،ايمت ما بدك نهال:بلكي العطلة الجاية ،ما عم فكر روح لعند اهلي و انت ابقي هون كمان قمر:ايه حلوة الفكرة ،ببقى …بشوف يعني اذا بقبلو يخلوني ابقى هون نهال:و منطلع مشوار سوا،منروح على السينما شو رايك ؟ قمر:ايه بروح ايه نهال:هاي انا خلصت سكرت الشنتا و قعدت هي و عم تتنهد نهال:صحي انت ما رح ضبي تيابك لتسافري قمر:ايه طبعا يلا قايمة قمت فتحت الشنتا و بلشت ضب تيابي و نهال واقفة معي و عم تتفرج على تيابي و تبدي اعجابا بذوقي نهال:كتير حلوين ليش ما عم تلبسين قمر:ما بعرف …ما كتير حبيتن

العضوة: 378864 , 7 years ago

قمر:ما بعرف …ما كتير حبيتن اختنق صوتي بالجملة الاخيرة و غص بالدموع،انتبهت علي نهال نهال:قمر ليش عم تبكي؟ قمر:…لانو …لانو اشتقت لاهلي بس نهال:بكرا بتشوفين قمر:ايه بس ما متعودة على بعدن هالقد نهال:كلنا كنا هيك اولتا بعدين تعودنا ،الظروف بتمشينا بطرق ما بحياتنا فكرنا نمشيها بيوم بس لحمدلله على كل حال قمر :لحمدلله تاني يوم فاقت الصبح نهال و لبست تيابا و سافرت لعند اهلا هي و كل الطاقم باستثنائي؛ابو سليم كان بيعرف وضعي و انو ما عندي اهل لهيك سمحلي ابقى بالغرفة ،طلعت ساعة وحدة تمشيت و اكلت بوظة و رجعت ،بعد يومين رجعت نهال و شافتني بعدني لابسة تيابي و شنتايتي على التخت نهال:ايمت رجعتي؟ قمر:من ساعة نهال:كيفا امك و اخواتك؟ قمر:لحمدلله مناح بعطلة الاسبوع التاني الي بالشغل ،ما راحت نهال عند اهلا و بقيت لنقضي العطلة مع بعض ،رجعت اقترحت علي انو نروح السينما و قمنا نجهز حالنا و متل العادة لبست التياب يلي بلبسن و برتاح فين كل مرة نهال:ما حلوين هدول ابدا ،تعي لقلك شو تلبسي فتحت خزانتي و صارت تطلع بكل قطعة حتى مسكت فستان ابيض طويل ،طالعتو من الخزانة و حطتو علي نهال:البسي هادا ،لابقلك كتير قمر:اذا عاجبك انت ،البسيه انت نهال:ههههههه عنجد ،ما بتدايقي قمر:لا ابدا ،عادي نهال:طيب رح البسو و رح اخترلك شي تاني قمر:انا مرتاحة بهدول نهال:لا لا انا رح لبسك على ذوقي هالمرة رجعت حشرت راسا بالخزانة و طالعت افرول اسود شيفون نهال:هيدا بطير العقل و بروح مع لون شعرك الاسود و كمان افلتي شعرك بيطلع احلى

العضوة: 378864 , 7 years ago

كمان افلتي شعرك بيطلع احلى لبست الافرول بعد تردد و اصرار نهال و هي لبست الفستان و طلعت بطير العقل فيه ، وقفت على المرية تسرح شعرا و تحط اكسسوارات و انا واقفة عم اتفرج عليا ،حتى قربت عليا و حطتلي حلق اسود ناعم بادني نهال:شو رايك؟ قمر:حلو ،يسلمو نهال :يلا خلينا نروح طلعت انا و خجلانة كتير ،حسيت كل العالم عم تطلع فيني ،حسيت منظري غريب ،شنكلتا لنهال و رحنا على السينما يلي دائما كنت شوفا من برا ،بس ولا مرة فتت لجوا ،قطعت نهال بطاقتين لفيلم كوميدي و اشترت بوشار و فتنا ،ضحكنا كتير حتى دمعو عيوننا ،نحن و طالعين من السينما لحقونا شابين و صارو يلطشو علينا ،انا تلبكت و خجلت و صرت بدي امشي بسرعة و اهرب منن و نهال كانت تبرم ضهرا كل شوي لعندن و تبهدلن حتى ملو و راحو،حسسيتا لنهال متعودة على هيك شي بس انا هاي اول مرة بحياتي حدا بلطشني و بيلحقني ،يمكن هالشي رفع من معنوياتي و خلاني حس اني بنت و حلوة كمان ،كانت علاقتي مع نهال يوم عن يوم عم تقوى و تصير احسن ،وصلت لمرحلة ما عاد شفت نهال صديقة او زميلة شغل ،صرت شوفا اختي و كل عيلتي و العطلة يلي تقضيها عند اهلا كنت فوت بحالة اكتئاب حتى ترجع و بس ارجع شوفا حس كانو روحي رجعتلي ،تعلقت فيا كتير لانو معا شفت جانب تاني من شخصيتي الروح المرحة و الانثى الرقيقة ،تغيرت كليا حتى التغيير شمل شكلي الخارجي و صرت اقلدا باي شي بتعملو من تسريحة شعر … مناكير …اكسسوارات ….مكياج. لبس حتى الكل انتبه علي كيف انقلبت و كانو صرت وحدة تانية بس نهال ما كانت تفوت فرصة لتثني على التغيير و كنت داىما تقلي انت نصي التاني ،حتى قررت تعرفني على اهلا