ممنوع وضع حسابات تواصل اجتماعي وتكرار المخالفه يعرض حسابك للحظر المشرفه هالحساب صرت ادخله يومياً حبيييته حييل وسبق نزلت قصة ولادتي بولدي البكر وكنت انتظر اولد عشان اقولكم قصتي الثانيه عندي ولدين والحمدالله ربي يخليهم لي وهذه ولادتي الثالثه حملت وعمر ولدي سنه و١١شهر ويوم عرفت تضايقت لانه باقي صغير وماخططت له وعندي ولدين الله يصلحهم تربيتهم متعبه الله يكتب الاجر وماأخفيكم اني حاولت اسقطه الله يغفر الذنب جهل مني بس بالاخير رضيت وحمدت ربي واستغفرت وعدت الشهور الاربعه الاولى عذاااب وحم فضيع ونفسيه كرهت بيتي وعيالي واهملت كل شي ويوم دخلت الخامس الحمدالله خف الوحم ورجعت اعيش حياتي طبييعيه بس ماكنت اتغذى على حملي والفيتامينات والحديد اهملتها مره اخذها ومره اتركها والحمدالله عدت الشهور على خير وثثقققل مو طبيعي مع ان كل من شافني ينصدم اني حامل كنت مررره نحيقه وكرشتي صغيره ويوم دخلت الشهر التاسع بديت امشي واكل اناناس ورطب واتحرك واشتغل في بيتي وكررفت نفسي كرف مو طبيعي المهم عدت الاسابيع وانا خلاص ماعاد فيني صبر تعب ومع البيت والعيال خلاص وصلت لمرحله ماعاد اتحمل اي شي ورحت اخر موعد للدكتورتي قالت مفتوح واحد سنتي وعندك بداية طلق بس كانه خفيف مرررره وقالت خلاص اذا تبيني اولدك تعالي يوم الاربعاء يوم مناوبتي عشان اكون موجوده اولدك طبعا كان باقي لي ٤ايام واخلص التاسع وقلت لزوجي وش رايك نروح لها يوم الاربعاء او انتظر الطلق يجيني قال الي يريحك وانا خلاص قلت ابي اولد اليوم قبل بكره قلت خلاص ان شالله بجيك الاربعاء رجعت البيت كان يوم الاحد وانتظر يوم الاربعاء يجي على احر من اجمر وكان تاريخ٢٨/١١وولادتي موعدها كانت ٢٩/١١يعني قبلها بيوم واروح المستفشى صباح الاربعاء خايفه ومتوتره دخلت غرفة الولاده الساعه٨وربع الصبح وبدلت وحطت جهاز التخطيط وشافت عندي طلق منتظم بس بارد وسوت كشف قالت ماشاءالله مفتوح٤سم 😳انبسطططت قلت وناسه بدون الم عساه ينفتح كذا بدون الم واقعد ساعه طلق خفيف واني اطلبهم يحطون لي طلق صناعي حسيت اني بطول وانا خلاص بديت اخاف وعلى طول من حطت طلق وانفتح لين ٨سم والالم بدى يشد علي واتصبر قلت هانت وراحت ورجعت بعد ساعه وسوت كشف باقي ٨وعلق على ثمانيه والطلق بدى يروح ويرجع وعلى طول طلبت ابرة الظهر ماعاد اتحمل وهم يهاوشوني يقولون خلاص مابقى شي المهم خذيت ابرة الظهر الساعه١٠وارتحت الحمدالله وانتظرت لين الساعه ١٢ونص الظهر وتجي الدكتوره تقول يلا ادفعي خلاص ولاده ودفعت مرتين والثالثه طلعت اميرتي الحمدالله ياهي فرحه يوم طلعت وانا بعافيتي وماطولت على ولادتها دخلت الساعه ٨وربع وولدتها الساعه ١٢ ونص الظهر والحمدالله قعدت عندهم ٤ساعات خايفين لايصير لي مضاعافت بعد ابرة الظهر وعلى طول طلعت للتنويم وماحس بشي لا المنطقه مبنجه وامشي على رجولي والوضع تمام بس بعد يومين بديت احس بالخياطه والالم بس محتمله ولا الطلق الي يعذب الحرمه ويقص ظهرها😣 والحمدالله لي ١٥يوم والده بس الخياطه معذبتني الله يكتب الاجر وعقبال الكروشات الباقين الله يسهل ولادتكم ويهون عليكم ونصيحه للي خايفه من الولاده تاخذ ابرة الظهر وهي مغمضه الحمدالله الطب تطور وحنا في نعمه الحمدالله