العضوة: 91922 , 9 years ago

الله يعطيكم العافيه بنات 👏🏼

العضوة: 89147 , 9 years ago

انا ولدت بمستشفى الحبيب الريان انا واختي وبنت خالي كذا مرة رعاية اهتمام ونظافة بالنسبة لي ممتاز فيه دكاترة ممتازين وفيه الي نص ونص انتي لازم تختاري الدكتور الشاطر

العضوة: 88020 , 9 years ago

@user-89147عند مين تراجعين؟ ومين الي يولد؟ ويدعمون الولادة بدون شق عجان ولا؟

العضوة: 89147 , 9 years ago

@user-88020 اراجع نادية وطلبتها بالولادة هم قالوا تبينها او تبين احد غيرها قلت لا ابيها وجتني بالولادة ماادري عن دعم

العضوة: 50713 , 9 years ago

يعطيكم العافيه الموضوع جاء بوقته على وجهه ولادة وماعندي فكرة عن المستشفيات

العضوة: 96256 , 9 years ago

السلام عليكم ورحمة الله وبركاته جمع مبارك بإذن الله الله يسعدك ياراعية الموضوع حطيتي يدك على الجرح من حملت وأنا محتارة اولد في مستشفى دله أو مستشفى حبيب التخصصي وحالياً اراجع في الأثنين تجربتي بالولادات في مستشفيات الرياض حملت وتوفى الجنين في بطني وكنت اراجع في مستشفى الحمادي على أيام عزه من ١٤ سنة وكنت في مراجعة عادية للدكتورة في الشهر الرابع ولما حاولت تسمع نبض الجنين ما قدرت تغير وجهها وحولتني فوراً للاشعة وجت معي تسويها بنفسها وكان الجنين متوفى وسويت تنظيف عندهم ممتازين بعدها حملت مرتين أول واحد ولدتني دكتورة مصرية اسمها أكرام وثاني مره ولدتني دكتورة آيه في الحمادي قبل ما تتركهم وتروح لدله وكان ما عليها مراجعين ما بعد عرفوها الناس توها دكتورة جديدة في الحمادي وكل هالدكتورتين ممتازين والمستشفى اهتمام ونظافة ورعاية تحسين انك في فندق مو مستشفى الممرضات يدخلون معي الحمام ويروشوني ماشفت في هالمستشفى شئ سئ إلا موقف حصل معي في ولادتي الثالثة عند أية كانوا حاطيني على سرير العمليات ومربطين يديني وعلي لبس ازرق ساترني والغرفة مليانة ممرضات والدكتورة آيه ومعها دكتورة ثانية غير طبيب التخدير وفيه هندي معهم ما أدري وش يصير وكانوا مغطين وجهي بقماش ازرق رافعينه ومميلينه شوي على وجهي يسترني وهالهندي وطبيب التخدير كل شوي يرفعون هالغطاء ويناظرون وجهي 😒 وقبل ما يحط طبيب التخدير البنج في المحلول سحبت وحدة من الممرضات هالقماش اللي ساترني وفجأة لقيت نفسي عريانه قدام هالعالم شعور محرج ومؤلم في نفس الوقت الكل يطالع فيك قامت الدكتورة آيه تخاصم الممرضة ليه سحبتي منها الغطاء ما بعد تخدرت لسا بدري والتفتت على دكتور التخدير وعطاني البنج الكامل على طول عشان كذا نصيحة للي تبي تولد قيصري خذي بنج نصفي تكونين واعية وقت العملية وتسترين نفسك لو تكشف جزء من جسمك

العضوة: 96256 , 9 years ago

رابع حمل راجعت وولدت في دله من ٤ سنوات ونص كنت اراجع عند الدكتورة مايسه أو ميساء ممتازة وانا اراجع قالوا انها ما تولد بس مراجعات وسألتها تولديني قالت إذا قيصري أولدك وإذا طبيعي ما أولدك وانا عندي ضيق في الحوض وكل ولاداتي قيصرية فعطتني امر تنويم ودخول للمستشفى للولادة واتفقت معها على الوقت وقابلت دكتور التخدير ويوم جاء موعد الولادة ودخلوني غرفة الولادة اتفاجأ أن اللي بتولدني دكتورة عراقية نسيت اسمها وعقب ما شقت بطني استوعبت قلت وقفي وين الدكتورة مايسه قالت عندها ولادة قلت انا اراجع معها ابيها تولدني نادوها هي اللي دخلتني المستشفى وعطتني امر الولادة قالت خلاص شقيت بطنك قلت ماعلي ناديها كنت مررره متوترة نادوها وجت كملت الولادة وأثناء الولادة طق الباب ودخلوا ثلاث طلاب بنتين وولد وقالوا نبي نشوف الولادة قالت لهم الدكتورة لا تدخلون هالولادة المريضة صاحية ماخذة بنج نصفي تعالوا للولادة الثانية بعد ساعة المريضة بنج كامل طبعاً كل كلامهم بالأنجليزي يحسبون اني ما افهم استغربت من مستشفى دله هالتصرف يعني هالمستشفى خاص مو حكومي تعليمي زي المستشفى الجامعي وحالياً اراجع في دله عند آيه زززززححمممة مو طبيعية آخر مراجعة معها غلطت في دواء يوم رحت للصيدلية اصرف الأدوية عرفت انها غلطانة بعد ما مسكت سراء عند الصيدلية رجعت لمكتبها وانتظرت ثلث ساعة عشان ادخل ما قدرت غير زحمة المراجعات عند بابها آخر شئ تعبت وشقيت وصفة الدواء وحجزت ثاني يوم في حبيب التخصصي ودخلت على الدكتورة وكتبت لي العلاج وصرفته خلال ربع ساعة بالنسبة لمستشفى الحبيب يمدحون فرعهم في الريان والفرع الرئيسي في العليا بس التخصصي ما عليه مدح كثير ناس تمدحه وناس تذمه وهو اقرب مستشفى لي في المراجعات مرتاحة معهم اهتمام ورعاية ومستحيل يخلونك تطلعين بدون ما يدخلونك على دكتورة مرة رحت لهم وكان عند دكتورتي ولادة جت المنسقة حقت العيادات وكلمتني شخصياً وقالت الدكتورة عندها ولادة متعسره وماراح تجي من تبين نحولك على اي دكتورة وعندهم استقبال واحد فيه كل شئ مو زي دله الاشعة له استقبال والتحاليل له استقبال والموافقات له استقبال غير الاستقبال العادي يشحططونك بين هالاستقبالات وكلها زحمة ولازم انتظار وتوقفين سرا مع هالعالم غير أن الغرف الخاصة في الحبيب احدث واحلى من الغرف الخاصة في دله

العضوة: 96256 , 9 years ago

عذراً طولة عليكم والله يسعدكم إللي عندها تجربة في مستشفى حبيب التخصصي تطرحها لأني متخوفة من اطباء التخدير ما يمدحونهم فيه وعنايتهم بعد الولادة ما يمدحونها اختي والدة فيه من ٩ شهور تسبه تقول كل شئ تمام لحد مارحت غرفتي مافيه طاقم ممرضات ومفرش السرير قعدت ثلاث أيام محد جاء يغيره وولدها إذا طلبته ما يجيبونه لها ويوم سأل زوجها الاستقبال ليه كذا قالوا عندنا نقص في طاقم التمريض وفيه تمييز في المعاملة بين اللي ماخذين غرف خاصة عادية وبين اللي ماخذين اجنحة ولادة اللي في الاجنحة طايرين فيهم ومع كل جناح ممرضة خاصة واللي في الغرف الخاصة مو ذاك الزود في العناية

العضوة: 96256 , 9 years ago

شوفي هالموضوه بيفيدك @user-53687

العضوة: 96256 , 9 years ago

الموضوع *

العضوة: 53687 , 9 years ago

@user-96256 مشكووووووره حياتي ربي يسعدك ماتقصرين. بقرا كل التعليقات الحين 😘

العضوة: 91922 , 9 years ago

@user-96256 ماقصرتي الله يعطيك العافيه والموضوع حلالك حبيبتي انا سويته علشان نستفيد كلنا

العضوة: 91922 , 9 years ago

مستشفى الشميسي فيه ناس كثير تمدحه الي تعرف عنه شي تكتب تجارب مشكوره في بنات يسألون عنها وانا بسأل هل فعلا قوى الامن السنه هذي يحولون لسند ومين جربت سند

العضوة: 96105 , 9 years ago

اللي تولد في الحبيب ولد لاتختنه عندهم..للان اعرف ٣ ختنو اولادهم غلط و عادوها اللي يعينهم

العضوة: 91922 , 9 years ago

@user-96105 الله يجزاك كل الخير ع التنبيه انا جربت عبيد والحكمه ومستوصف في النسيم ناسيه اسمه كلهم ممتازين