لا ياس مع الله منقووووول سلام عليكم بنات اليوم حابه اكتب لكم قصتي بيوم عرفه السنه الماضيه .. أولا : العام قبل يوم عرفه كنت مثل أي بنت تتمنى الزوج الصالح والاستقرار المهم سبحان الله كنت متأخره بالزواج لأسباب كانت خارجه من يدي . ثانيا : سبحان الله من رحمة الله العام الماضي لمن قرب يوم عرفه قبلها بأسبوع صارت تجيني بالواتس قصص لناس دعوا الله في يوم عرفه واستجاب الله دعواتهم من ضمنها الزواج والحمل وهكذا . ثالثا : انا كنت مستبعده أمر الزواج بسبب الأسباب للي حولي وكنت محطمه تماما من هذا الموضوع .. جلسة تكرر القصص وترسل لي أنواع أشكال عن فضل الدعاء بيوم عرفه وإنه مجاب فيه . رابعا : سبحان الله كأنها رسائل من الله لي ففكرت وقلت لي مالدعي بيوم عرفه واختلي فيه مع رب العالمين وأكون مثل هالقصص للي تجيني .. كان هذا إلهام من الله لي .. كنت مقصره كثير أمام الله بس رحمه الله فيني كانت عظيمه . خامسا : عزمت وقررت هذا القرار إني اختلي مع الله .. كنت وقتها طالبه مغتربه وآخر سنه لي بالجامعه فكان مسجد الجامعه مفتوح لنا للقراءه والجلوس فيه .. فقلت لو جلست بالبيت راح انشغل وكل شويه راح اسولف مع البنات وكذا فكان قراري هو الذهاب للمسجد واعتكف فيه لين المغرب . سادسا : وسبحان الله وحده من البنات قررت تروح معي وشجعتها المهم خذيت مصحفي وشرشف الصلاه للي كنت احبه حقي وأقفلت جوالي وتركته لأني بروح لله وماحبيت يشغلني شيء عنه .. وسبب أخذي لشرشف الصلاه ماحبيت اجلس بالعبايه حبيت ادعي الله واعتكف بأحب الملابس لي . سابعا : صحيح كنت صايمه وخذيت معي كم تمره ومويه بس .. المهم صحبتي للي راحت معي الله يشفيها كان عندها كلى اول مامرت ساعه من الاعتكاف مرضت بشده سبحان الله وحاولت تجلس بس كان صعب عليها وبيتنا بعيد .. فكان علي إني أقطع الاعتكاف لأجل أرجعها وفي قلبي حزن اني هذه الساعه راح تروح مني بس توكلت على الله وقلت يارب انت تعلم قلبي وخذيتها للبيت ورجعت المسجد .. ثامنا : قبلها كنت إحتجت أجدد الوضوء ورحت توضيت وكان المسجد دورين قسم الحريم .. المهم بعد الوضوء كان الصلاه أقامت ونا كنت جالسه فوق بس حبيت اصلي بالأرضي للي الناس الماره تصلي فيه وكان مزدحم أكثر من فوق . تاسعا : كانت تصلي جنبي إمراءه كبيره بالسن الله يكتب لها الخير وباين من مظهرها انها على قد حالها وماكان معاها شراب وعبايتها قديمه وكل مره تحاول تغطي رجلينها بس كان صعب ... عاشرا : المهم بعد ماانتهينا من الصلاه وخلصنا أقبلت علي المراءه الكييره الله يكتب لها الخير ويفتح عليها من عنده .. قالت لي انها حبت شرشف الصلاه حقي وأنه جميل وأنه طويل ويستر وقعدت أشكرها على ثنائها علي .. بعدين سالتني من وين شريت وأخبرتها من باب اللطافه لو حابه مثله ياخاله أجيبه لك .. الحادي عشر : المهم كان جوابها صدمني قالت لا يابنتي أنا أبغى هذا للي انت لابسته طبعا ( شرشف الصلاه هذا من أحب الأشياء لي وماكنت أرضى احد يلبسه أو يلمسه وكنت حريصه عليه رغم تقصيري أمام الله ..الله يغفر لنا ) .. الثاني عشر : سكت دقيقه وهي شافت في عيوني الصدمه او الحزن فقالت على الطول امزح معك يابنتي بعدين استحيت ..ليس حبا في ماأملك فكان من طبعي أعطي الجميع بس هذا الشي كان غالي علي كثير .. قلت لها مسرعه عادي ياخاله كنت افكر كيف أعطيكي ونا لبسته وماهو مفسول ولا معطر أستحي منك .. الثالث عشر : قالت عادي يابنتي راضيه فيه مثل ماهو ترجيتها تنتظر بالمسجد وأروح البيت أغسله لها وأرجع لها في ساعه بس كانت رافضه تماما قالت ابغاه مثل ماهو .. الرابع العشر : المهم وافقت بالأخير وفي قلبي مشاعر بس ماقدر أردها .. قلت لها أصبري هنا أنا أعراضي فوق بروح ألبس عبايتي وأعطيكي الشرشف طلعت الدرج ولبست عبايتي وكان أبسط شيء قدرت عليه أطبقه لها .. وعطيتها ولبسته قدامي على الطول وقالت لي الحين ماراح تنكشف رجولي ثاني بالصلاه أبدا .. الخامس عشر : حزنت على كلامها في حين كان هذا الشيء برد على قلبي إنو شرشف الصلاه حقي راح لمن هو أحق مني وأحسن مني وكان اختبار من الله لي في التخلي عما كنت أحبه وأتملكه . السادس عشر : رجعت لمكاني وبديت ادعوا الله وفجاءه القصص للي كانت ترسل لي وقريتها اكثر من مره .. من كثر ماتكرر علي جات ببالي .. الزواج والحمل .. قلت لي ماتدعين الله انو السنه الجايه يرزقك بالزوج ومايجي عرفه القادم إلا ونت حامل .. ماكذب عليكم دعيت بس اقول معقوله بيصير لي كل ذا كنت واثقه بالله بس بني ادم كأني استبعدت او في قلبي ماتوقعت بس كنت أدعي بثقه انو الله مايعجزه شيء. السابع عشر : دعيت لي أذن على المغرب والحمدلله حسيت براحه رجعت البيت وفطرت مع البنات ونسيت الامر كله .. الثامن عشر : بعد يوم عرفه بأربع أيام تم خطبتي وكانت المفاجاءه وبسرعه وتواصلت مع خطيبي وسبحان الله من سخره لي إنتظرني خلال أربع شهور لأجل أتم جامعتي وبعدها صارت ملكتي .. التاسع عشر : وكان زواجي بعد ملكتي بثلاث شهور وسبحان الله كانت بيسر وسهوله ونصرني الله على كثير كانوا استنقصوا مني ومن شكلي .. فزوجي الله يحفظه شخص متعلم خلوق والحمدلله يعني للي أقل منه ماكان أحد راضي لي بس جاء نصر ربي لي .. وراحت الأسباب العشرون : وسبحان الله بعد الزواج بفتره وجيزه صار حملي الحمدلله وها أنا اليوم أكتب لكم قصتي حامل ورزقني الله بعد صبر ( قد جعلها ربي حقا ) الله عوضي عوض ماكانت أتخيله امكن كانت دعوه بس وقفتي الله لها . أخيرا : لا تيأسوا من الله أبدا قادر لايعجزه شيء ولاتنسوا يوم عرفه هذه السنه خصصوا لها ولو ساعه للاختلاء مع الله والدعاء .. لكل أم لكل حامل لكل من عندها مشاكل مع اهل زوجها مع زوجها لكل من تبغى الذريه لكل من عندها هموم .. يوم عرفه قادم استغليه الدعاء مجاب فيه يوم عظيم .. أسال الله العلي القدير يبلغنا يوم عرفه على خير ويوفقنا للدعاء فيه ويقبله منا .. اللهم امين امين ملاحظه : حبيت أجزء القصه لأني أكره الكتابه ورى بعض .. وأعتذر على الاطاله وسلام عليكم .