منقول من كروب دكتوره زينب شلونكم بنات ... اليوم احجيلكم نبذه مختصره عن خياطة العجان .. يعني خياطه الولاده الطبيعيه ... اول شي لازم تعرفوه انه كل امرأة بكريه من الافضل لسلامتها وسلامة طفلها انه يسوولها فتح داخلي .. لان اذا مفتحنه المنطقه لو تتوسع كلش وهالموضوع ياثر عليها بعدين من تكبر .. لو تصير تمزقات وهم تتخيط من جديد .. الفتحه اللي نسويها هي تكون غالبا في الجهة اليمنى السفلى من العجان .. وتكون من الداخل عميقه شويه ومن الخارج واللي هو الجلد تكون مرات صغيره مرات كبيره .. في كل الاحوال الفتح هو لضمان صحه عضلات المهبل .. يعني اللي تنتفتح لتنقهر لان هالشي جدا طبيعي .. خياطه هذا الجرح يتم بعدة طرق .. اكو ناس تسويه طبقات .. واكو ناس تخيطه كلها طبقه واحده .. والطريقتين صح .. المهم انه ترجع كلشي لمكانه وانه متبقي نزيف من الجرح .. اذا كانت السيده تعاني من التهابات داخليه هنا مصيبه .. لان الجرح صعب يتخيط .. وينفتق الخياط حتى اثناء ما احنه دتخيط .. لان المهبل متهري من الالتهاب يكوم الخيط ميلزم او ينشلخ الخياط .. هنا يصير الخياط صعب .. ومرات نخاف نلح بيه .. ونخيط ونصلح اللي نكدر عليه وبس .. الى ان السيده تطيب من الالتهابات يللا نكدر نرجع نرتب .. اكو قسم من الحالات نحط شاش داخل المهبل بعد ان نكمل خياطه وذلك لسد الجروح الصغيره اللي بسبب الالتهابات متتخيط .. او كلما نخيطها تفتح .. فتكون الطريقه ان نسد عنها النزف وبس وهي تلتام من وحدها .. واعتقد هوايه منكم صارت عدها هالحاله ... الخيوط اللي نخيط بيها انواع واشكال والوان .. سابقا كان اكو خيط لحمي ..لونه يصير جوزي .. وهو بلون اللحم واسمه cat gut .. الاسم مشتق من cattle gut ..اي امعاء المواشي .. لان الماده المصنوع منها هذا الخيط هو فعلا من امعاء المواشي .. ومن صارت شغله جنون البقر اتحرم هالنوع دوليا .. لكن بالعراق الشغله سايبه فلازالوا يستعملوه .. هذا الخيط هو اكثر خيط يلتهب .. لان جسم الانسان ممكن يرفضه .. لذلك اتطورت الصناعات وصار اكو خيط افضل منه .. وهو الخيط الvicril واكو safil الاول لونه بنفسجي والثاني اخضر . واكو انواع لونها ابيض .. هاي كلها زينه وحاليا هي الاكثر شيوعا .. هاي الخيوط يمتصها الجسم خلال ٦٠ يوم .. يعني من الداخل يتخيط بيها خلال ٦٠ تذوب وتروح .. لكن الخارج من يتخيط بيها لو توكع من وحدها لو تنشال .. بالنسبه الي الافضل تنشال .. اكو خيط اخر . وهو الخيط الحرير ..slik هذا لونه اسود وهو فعلا مصنوع من الحرير .. ايضا لان ماده طبيعيه فهو معرض للالتهاب .. وهذا الخيط ميذوب هذا لازم ينشال .. هسه نجي على سوال جدا مهم .. شوكت اشيل الخيط ؟؟؟🤔🤔🤔 تشيليه بعد ١٤ يوم .. اهم شي بالخياط هو نظافته .. لازم تدارين جرحك كلش زين ولازم احد مختص يشوفه الج بعد الاسبوع الاول .. لان ممكن يبدي يلتهب .. واذا التهب بعد بالكوه يطيب .. وبالاسبوع الثاني حتشيلين الخيط وهم لازم تعقمه الج الطبيبه .. خلال هاي الاسبوعين لازم تحاولين تخلين الجرح ناشف قدر الامكان .. ومن تشيلين الخيط حطي دهن مال جروح حتى يطيب تماما .. الماء والملح جدا مفيده للجرح .. صابون الركي لا لا لا .. لتغسلين الجرح بالصابون .. عقميه بالمعقمات والماء والملح كلش كافي .. من تتخيطين اكعدي عالجرح ولتكعدين صفح .. اللي تكعد صفح يلتهب جرحها وتوجعها فقراتها وظهرها .. اكعدي عدل عالجرح صح يوجعج بس اول مره ووراها تصيرين كلش زينه .. هذه معلومات مختصره عن الموضوع ... اللي على وجه ولاده الله يقومك بالسلامه ومن هسه اكلج عالجي الالتهابات .. ارفعولنه المنشور حتى الكل تستفاد الله يرضى عنكم .