بوست مهممممم لكل سيدات العالم.🙋 10 نصايح لاختيار دكتور النسا بتاعك : ********************************* 1) يكون بيسمع ,, عشان نُص التشخيص من كلام المريضة .. وعشان الستات بيحبوا يتكلموا :) 2) يكون بيتكلم ,, يفهّم المريضة تفاصيل حالتها كويس .. عشان يغنيها عن الدخول على المنتديات وسماع كلام قرايبها .. وعشان الستات برضه بيحبوا يتكلموا :) :) 3) حسن المظهر ,, عشان الدكتور اللي شكله مبهدل في نفسه غالباً هيبقى دة شكل جرح العمليات بتاعته برضه !! وياريت متحكموش عليا في العيادة بعد الساعة 3 الفجر😴 .. إنسان برضه 4) حسن السمعة .. وقصدي هنا مراعاة ربنا في مرضاه وشغله ونتائج حالاته طبعاً .. 5) صريح .. بس مش قوي .. عشان الصريح قوي مبيعجبش عندنا !! وانا مجرّب بنفسي .. 6) يرد على تليفونه في أي وقت .. للأسف 😞.. لأن دكتور النسا اللي مش هتعرفي توصليله وانتي عندك برد مش هتعرفي توصليله وانتي بتولدي.. (( بس أنا بالذات لو كل الحالات كلمتني وهما عندهم برد .. نص اللي بيولدوا مش هيعرفوا يوصلولي.. 😧 )) 7) يكون صاحب قرار .. ميدوخكيش معاه .. هنعمل العملية لأ هناخد العلاج لأ هنبدأ بالعلاج بعدين العملية ( إلا إذا كانت الحالة ممكن فيها الاختيار من المريضة ) 8) يحوّلك ع المعمل أو دكتور الأشعة الشاطر اللي بيثق فيه .. مش اللي متفق معاه ,, وبياخد منه نسبة آخر كل شهر 🤑 .. ( وللأسف دي مبتتعرفش بسهولة 🙆 ) 9) ميريحكيش على حساب مصلحتك .. مبدأ الزبون دايماً على حق .. وريّح الزبون أحسن يطير .. مينفعش في الطب وبالذات في النسا .. 10) أمين .. لو مش متخصص في حالتك يحوّلك على دكتور متخصص .. الدكتور بتاع كله دة عندنا في مصر بس مش في أي مكان تاني .. من الآخر .. اختاري الدكتور اللي بترتاحيله وريّحي نفسك وريحيني 😇