منقول عجبتني فرطت ضحك " بدي عروس 16 سنة و ملونة و صاحبة دين و اهلها اكابر " " بدي اخطب لاخي بين 24-28 و تكون حلوة " " بدي بنت وحيدة امها وابوها وما لها اخوات " !!!! " مطلوب عروس حلوة و دارسة وما بهم محجبة او لا " " مطلوب عروس 16-17-18 سنة مو اكتر و بنت عالم وناس" " يلي بيعرف بنات للخطبة و على سفر تبعتلي الارقام " * هالكلام كتبته إحدى الأخوات على صفحتها. نقطتين حابة علق عليهم: بدايةً الزواج يا جماعة الخير مشروع حياة، وقرار مين يكون شريك حياتك من أهم قرارات العمر.. لأنه مو بس بيأثر على سعادة عيلة وحدة وخلص.. إنما بيأثر كمان على تكوين ووعي مجتمع بأكمله! وقرار الزواج بتصوري لازم يتم بناءً على توافقات فكرية ومجتمعية ودراسة مفصلة لأديش ممكن الزواج ينجح بين الشريكين.. مو عالبركة! أما عن فكرة انو بدي البنت حلوة وما بيفرق معي شي تاني، وبدي ياها بيضة وطويلة وخلص.. طيب يا شباب، هي البنت حتكون أم لولادك وشريكة حياتك بكلشي.. ما بيهمك شوي دينها وأخلاقها ووعيها وذكائها الإجتماعي مثلاً..! ومو حاسس أخي أديش في جوانب كتيرة مهمة بالبنت بتكون أغفلتها لما تختزل البنت فقط ب لون عيون أو لون بشرة أو طول أو أو.. ؟! الشغلة جمال وبنركد.. خلص؟ بعمرنا ما سمعنا انو الجمال عمر بيوت أو كان سبب السعادة بين زوجين.. بالآخير، رفقاً شوي بمشاعر إنسانة عم ينحكى عنها وكأنها منتج معروض بالسوق! وبعدين بنستغرب ليش كتير من البيوت الزوجية بمجتمعنا مليانة مشاكل وتعقيدات وهموم.. وليش كتير علاقات زوجية بيكون مصيرها الطلاق، أو الأسى المستمر! للأسف.. #قل_هو_من_عند_أنفسكم الله يرزقنا الوعي. بتمنى يوصل الحكي لجروبات الخطّابين..