السلام عليكم ورحمة الله وبركاته لكل ام مقبلة على الولادة وناوية ترضع طفلها رضاعة طبيعية من صدرها بس عندها مشكلة ""اما انها تعاني من الم وقت الرضاعة ""او طفلها ما يشبع فتفضل انها تزيد مع الرضاعة الطبيعية حليب صناعي ⏺بداية متى تكون اول رضاعة؟ اول رضاعة بعد خروج البيبي من الرحم وهو حاطينه على صدرك اطلبي منهم يساعدونك عشان ترضعينه ⏺باكون تعبانة ومافيني حيل كيف ارضعه؟؟ اكيد انك بتكونين تعبانة لكن الطفل يحتاج هذي الرضاعة ممكن تأخرينها لوقت خروجك للغرفة لكن ما يكون وقت طويل المفروض انها تصير بأول ساعة لحياة الطفل الاسباب: •الوقاية من نوبات انخفاض السكر للرضيع •شعور الطفل براحة والامان على صدرها بعد خروجه لعالم جديد •حاجة الطفل ‏لحليب اللباء من الساعة الاولى لخروجه (طبعاً معروف وش فايدة اللباء) ⏺وش الطريقة الصحيحة لجسم الطفل والام وقت الرضاعة؟؟؟ اهم شيء ان جسم الطفل ما يكون مستوي على الارض تماماً وهو على ظهره استخدمي اي وضعية بالصورة مريحة لك لاحظي جسم الطفل دائماً على الجنب او على بطنه مو على الظهر ❌ افضل وضعية للرضاعة يكون بطن البيبي على بطن الام وهو يرضع ⏺ كم تكون مدة الرضاعة؟ غالباً تكون ٣٠ او ٤٠ دقيقة اول ١٠ دقائق تكون حليب ماء و بروتين و بقية الدقائق تكون دهون وهي اللي تشبع الطفل ⏺ انا ابغى طفلي يرضع من الثديين بنفس الرضعة ... ١٥ دقيقة على كل ثدي يخلص من الاولى ويبداء بالثاني لان اول ١٠ دقائق من الثدي مثل ما قلنا فوق ما تشبع الطفل ⏺طفلي ينام وقت الرضاعة وما يكمل رضعته؟ السبب انه حاس بالدفء خففي ملابسه وفكي اللفة اللي عليه لان هذا وقت رضاعة مو وقت نوم ⏺ انا رضعت من قبل طبيعي وندمت لان طفلي صار يبغى ينام بحضني ويبكي طول الوقت؟؟ الغلط كان من الام مو من الطفل لانها وقت الرضاعة تخليه ينام على صدرها فتعود انه هذا مكان النوم هذا ما يمنع انك تحضنينه او تحطين يدك على جسمه وقت النوم لكن انه ينام على الصدر بيكون متعب للام + انه ما يشبع من الحليب لانه نام بوقت الرضاعة ⏺ احس طفلي ما يشبع من صدري وش الحل؟ ان الطفل يبكي ويبغى صدر امه هذا ما يعني انه ما يشبع من صدرك ممكن انتي ما تعطينه وقت طويل للرضاعة لين يوصل لمرحلة الدهون شوفي الصورة عشان تعرفين مقاس معدة طفلك ⏺احس حليبي قليل وصدري جاف؟؟ لاحظي تغذيتك تشربين ماء على حسب وزنك -شوفي موضوع الماء اللي حطيته لحم -خضار - فواكه - سمك - حليب - وبقية الخلطات حقت الامهات بس انتبهي في اشياء ممنوعة لانك ترضعين اهم شيء ((الحلاوة الطحينية)) ⏺ انا تعبت من الرضاعة خصوصاً اني مسوية قيصرية ما اقدر ارضعه كثير لازم ادخل حليب صناعي ؟؟؟ الطفل اللي ينولد بعملية قيصرية حاجته للطبيعي تكون اكثر من اللي ينولد طبيعي والسبب مرور الطفل بمنطقة عنق الرحم تعطيه فلورا الامعاء بعكس المولود بالقيصرية الحل هو انك تسحبين حليب من صدرك وتحطينها في رضاعات وتحطينها بالثلاجة متى ما حسيتي انك تعبانة استخدميها بديل لصدرك ⏺عندي الم في الحلمة وقت الرضاعة وش السبب؟ الطفل لمن يرضع لازم يمص كل الحلمة مع الهالة الغامقة حول الحلمة بمعنى مص الحلمة فقط غلللط وممكن يسبب نزول الدم مو بس الم شوفي الصورة👇🏻👇🏻 ⏺ طريقة تحضير نفسك للرضاعة لازم قبل الولادة ترطبين حلماتك ما تكون متشققة وجافة وفي كريمات كثيرة خاصة لهذا الشيء فقط ترطيب مو فرك للحلمة ⏺وش سبب الم اسفل البطن وقت الرضاعة؟؟ هذا الالم طبيعي جداً بسبب تقلص الرحم لرجوعه لوضعه الطبيعي 🛑ام زوجي/ بنت الجيران/ عمتي/ خالتي/ جدتي تقول انتي ما عندك حليب طفلك نحيف شربيه صناعي شوفيه يبكي جيعان وتوك مرضعته صدرك جاف ..... كلام التحطيم يأثر على الام والذكية اللي تدافع عن نفسها واللي تصدق هذا الكلام تكون حرمت نفسها وطفلها من مرحلة اساسية في علاقتها مع طفلها الحل وقت الرضاعة قومي غرفة ثانية ورضعيه لا تخلين احد سلبي يتدخل بطريقة رضاعتك طول ما انتي صح بكيتي وحسيتي انك بديتي تتأثرين اقطعي كلامها وقولي انا امه واعرف منك وهذا صدري واشوف بعيوني اذا طفلي يرضع او لا سكري الموضوع نهائياً لكل السلبيين. 📍ملاحظة اخيرة انا اكتب المواضيع هذي لوجه الله وعشان الكل يستفيد فاذا استفدتي سوي رفع خلي غيرك كمان يستفيد 🌹 وادخلوا شوفوا بقية المواضيع بتفيدكم باذن الله سواءً قربت ولادتك او باقي وقت على الولادة حالياً فيه بعض المستشفيات الحكومية تسوي دورات 🛑تعليمية للرضاعة بالتوفيق للجميع اتمنى لي ولكم ولادة ميسرة💓