الحمل وسنينه 🤰 1- الحمل مش مرض ، ده حاله فسيولوجيه طبيعيه مصاحب ليها أعراض طبيعيه للحاله الفسيولوجيه دي والاعراض دي مش بنعتبرها مرض .فعيشي حياتك بصوره طبيعيه وانبسطي بالحمل. 2-ببساطه أول أسابيع الحمل كلي اللي نفسك تروحله وابعدي عن الاكل اللي بيتعبك حتى لو حماتك قالتلك مفيد للعيل، راحتك برضه مهمه . بس مهم ان نظبط مواعيد ثابته للأكل وبكميات صغيره. 3- والله العظيم والله العظيم مفيش مشروبات ولا أكلات بتجيب طلق أو بتعمل ولاده ، والا كانت اتباعت بالجرام . 4- عامل السن مالوش علاقه انك تولدي طبيعي او قيصري، والبيبي مش بيشرب المياه اللي حواليه فبلاش تصدقي ان ده سبب للقيصريه. 5- تشخيص ضغط الحمل بيتم من الشهر الخامس ومش من ارتفاع قياس الضغط مره واحده، لا طبعا لازم يتقاس كذا مره قبل تشخيص وجود ضغط حمل. 6- لو الدكتور قاللك ضغطك عالي وماكتبش علاج للضغط ، أسف اني اقواللك انه بيضحك عليكي ومفيش مشروبات بتعالج ضغط الحمل. 7- مفيش ولاده بتتحدد انها قيصري من الشهر الخامس علشان المشيمه نازله او ساقطه تحت او ان البيبي جاي برجليه، لان كل ده طبيعي في المرحله دي من الحمل . 8- تحاليل الحمل الدوريه مهمه علشان منتفجئش بأنيميا حاده عند حضرتك قبل الولاده ، مش لازم تزنقينا كلنا . 9- في حاجات مهمه تستدعي انك تكلمي طبيبك اوتروحي المستشفي لو حصلت بالذات في الشهر التاسع زي نزول مياه كتيير ، وجع منتظم او دم أو اختفاء حركة البيبي ليوم كامل ، فمتسمعيش كلام حماتك ان ده عادي واقعدي في البيت لحد ما الوجع يزيد أو تروحي وانتي بتولدي على باب المستشفى. 10- لو حصل وحملتي على اللولب وتم اكتشافه بالسونار في الاسابيع الاولى من الحمل فيفضل شيل اللولب لو مش ملتصق بكيس الحمل وعلى فكره متخفيش من شيله لان لو سيبتيه برضه في نسبه عليا ان وجوده يعمل اجهاض .