خواتي حبيت أفيدكم من تجربتي المتواضعة مع اعراض الحمل ، الكلام اللي بكتبه من تجربتي و قرائتي للكتب و استشارة للأطباء .. كل الحلول طبيعية ما تتضمن أي أدوية او وصفات طبية اول أعراض الحمل هي الغثيان ، من أكثر الأعراض إزعاجاً خصوصاً الصبح بس الحمدلله قدرت اسيطر عليها من خلال اكثر من طريقه : - اهم شي ما تغيرين وضعج بسرعه ! .. مثلاً اذا قمتي من النوم اقعدي خمس دقايق فالسرير بعدين تحركي او اذا كنتي قاعده فتره طويله خذي راحتج و انتي توقفين بالمختصر تجنبي الحركات الفجائيه و السريعة - شريحتين زنجبيل في غرشة ماي كنت احطها جنب سريري و اول ما اقوم اشرب و انتظر خمس دقايق فالسرير و بعدين اقوم ، ممكن بسكويت الزنجبيل او حلاوة الزنجبيل تكون بديل .. ادري بتقولون الزنجبيل حار و ممكن يسقط الجنين ، بالعكس هذا كلام اطباء و مثبت علمياً اهم شي ما تتجاوزين شريحتين زنجبيل فاليوم و على فكرة اغلب انواع الشاي المخصصه للغثيان الصباحي تحتوي على زنجبيل - اول ما تقعدين و انتي فالسرير كلي بسكويته مملحه او حلوه اللي تحبينه و تتقبلينه ، و انتظري فالسرير شوي و بعدين قومي .. هذي الطريقة تمنع حمض المعدة من الارتفاع للمريء بالتالي تتجنبين اللوعه .. انا اخذ بسكويت TUC (أرفقت صورته) - معجون الاسنان يسبب لي لوعه و استفرغ بعده ، فـ كنت اتجنبه اول ما اقعد من النوم كل اللي اسويه اني اتفطر شي خفيف كورنفلكس او قطعة خبز بجبن بعدين اغسل اسناني و اكمل فطوري - في اساور موجوده فالصيدليات و المواقع الاجنبية ، فكرتها انها تضغط على مكان معين في اعصاب اليد بالتالي توصل هذي الاشارات للمخ و يخف الغثيان خلال خمس دقايق بالكثير سبحان الله .. جربتها و كانت جداً جداً تساعدني خصوصاً اذا تفاجئت بالغثيان و اللوعه و انا برع البيت ( أرفقت لها صوره مع الموضوع ) بس حبيت اوضح ان ممكن اللي فادني ما يفيد غيري بسبب الفروق الفرديه خلال الحمل ، شاركتكم هذي الاشياء من باب "أحب لأخيك ما تحبه لنفسك" فالنهايه حبيباتي الغثيان من الاعراض الصحية للحمل لا تتضايقون و لا تتذمرون و احمدو الله ، اتمنى لكم حمل ميسر و خفيف و ولاده سهله و ذريه صالحه تبركم و ترفع روسكم يارب ♥️